1Pe 3 | BEF | STEP | To ya higo ana'magita lenali ana hite bahatinimagihi agoya hi epite minalo. To bahatini Hu'mamofihi kamu'i mekehelise minelata nehana ya nehinogo komopa'ani enele'mo keta mehuse hilabe lite agoya hi epite minalo. Lenali ya hite mineletetini ka lu meepise fa'mene komopatini bati hinogo minenogo enali bu lenegelete Hu'ma ma'naka luto lenalitoga nominabe lite kehelilabe. To bahatinimagi ya'ma lenali komopatini gulu gulu linogo bati hite minete nehago kehelite enali komopa'ani i gelehe hite Hu'mamofihi kaga kehelite ananalo mege'i malalabe.

1 Peter 3

Bo alobole lolo hi'aha'ina ka'a

1 To ya higo ana'magita lenali ana hite bahatinimagihi agoya hi epite minalo. To bahatini Hu'mamofihi kamu'i mekehelise minelata nehana ya nehinogo komopa'ani enele'mo keta mehuse hilabe lite agoya hi epite minalo. Lenali ya hite mineletetini ka lu meepise fa'mene komopatini bati hinogo minenogo enali bu lenegelete Hu'ma ma'naka luto lenalitoga nominabe lite kehelilabe. To bahatinimagi ya'ma lenali komopatini gulu gulu linogo bati hite minete nehago kehelite enali komopa'ani i gelehe hite Hu'mamofihi kaga kehelite ananalo mege'i malalabe. 3 Ana'magita, lenali lenugufamofihi sekele mamu'a hiti nagatu le'mo bati hite okatini yigite le'mo bati hite sekele mamu'a hiti lenigi lenayapofihi helele etenogo to pesesu'i mina'a tito minenogo ananatu ikolo bilata gu'i fayaha'a hiti yamofi kumu kehelinogo fa'menena lolo hino. 4 Ya nehinogo ketipa ito fuluna'amofihi sekele mamu'a yauba amuya moloto minolatanamofihi yanauba komopatinigu kikipa hoto minolatana ni'ibe. To tafana meli'ohuta yauba ya'ma Hu'mau hapatini kehelito gelo binogo ya'ma mina'a tito minalibe lite lilabe. 5 Ema afeha'aga ana'magi mono kagamofihi mege'i amuya melete mineme bi'ahana enali komopa'animofihi sekele mamu'a hiti nasana'ya lite mine'ahana. Ya hilete Hu'mamofihi keheli ule'ale hite baha'animagihi keheli epite mine'ahabe. 6 Koyapa a'uba Selau aiya ana suhi huto baha'a Abalahahi kaga'a keheli emito ai kumu kibina bo'ni yabe luto lu emito mino'ehina. To lenali ana'ina bati hite lolo hite anana'mu lenelesa melinogo minalana, ya hite ai'a yagapana'a lolo hite nehabe luto lu lepalalina'mu yabe.

7 To bona'magita, lenali ana suhi hite lihatini hiti hepite mine lite bite minete lihatinimagihi kaba hu bati hite minete ana'ina'ya fulunaguti li epite minalo. Ana'magihi enugufa'ani amuya memolo'ehina ni'inaya aku'i enali hiti lenali bomagita hiti mino kosaba huse'na ana hite lilana'mu yabe. Ya'mu lenali lihatini kumu keheli bati hite minalo. Lenali hiti lihatini hiti ya'ma koguna ite bati hite moneko komopatini lolo hinogo Hu'mamofitoga lilete nunumu hinogo yauba fa'mene lolo hu lalibe lite ya hite minalo.

Minoto lito hilutauba koguna bati mehinago liginaga fise'namofihi gupisalo tilutamofihi ka'a yabe.

8 To kaga lu su hoto lu lepilube. Lenali silaga'i lenalalutinigi hiti mino moneko hite komopatini ketipa inogo ai mehi eminogo ai mehi eminogo ya nehite lenalalutinigihi leniginaga finogo minete lenugufatinimofihi lime limite minalabe. 9 Ana'ina foipana lelite tinogomo lenalitinigo fililata nasana foipana lelite metilo. Lenali lube laga hibe nehinogo lenaliya nona'a meepise bebe sose ka lu epilo. To lenali ana hite lusa gise ka lilabe luto Hu'mamofihi elesa molo'ehinamo ni'ibe. 10 Ya'mu mono bukugu kaga mone fayahi keye'ahanamo ma huto ni'ibe:

Mone'i enali amuya moloto minolata nohuta
ya'mu laga epesinogo
yatama kanagu ma metoga minete
legelo bito minoto lito hilune,
lite linogo
kenetufa'anilo kaba hite minete
foipana melilabe.
To lenabagaguti faga faga mone melilo.

Foipana he'mi su hete

lenemegesa hi emite

ana'ina lamana'a hilabe.

Fulunagu nehinogo amuya melete lilabe.

Sipi Bouba ai bati hite neminana'a

enalitogago gobisa epito

aitoga neminana'a

ya'mu ekesa mololoto enegeba huto nohibe.

Foipa foya lilata bona'i enali'i

Sipi Bouba bu enogoto kosele'i hago

megesa hu epilata nohibe.

13 To ya huto ni'igo lenali ana'ina lamanana bite li'ehinogo moneuba ana'ina foipa'a henabe luto lepilibe? 14 To lenali bati hite neminete to ginaga fise'namofihi gupisa'alo tilana'mu lenegelo bilo. Yamofihi Sipi Bouba keheli'ehinogo lenegelo bilana kehelilina'mu yabe. To luba li huto hu lepilinaya lenali nekehelite lenelesa nelinogo afoya foya meilo. To ana hite lenuluhaya metino. 15 Komopatini nokala hite le'mo bati hilenogo Kilisitou ai pa solata sipi bo lolo hu lepeleno. Ya hilenogo ai kaga'amu komopatinitu fifa ilata nehana yana'mu loka nehi lepelenogo keta mehuse hite hapa'a lu hokolo hu lepilune lite nelite le'mo bati hite minalo. 16 Ya nehite kele'na ka lu meepise agoya hite lu enelepilabe. To enali kumu keheli sibina mehise, keheli bati hite lu enelepilabe. Ya nehinogo lenali kumu lu sibina sabana nehinogo Kilisito hiti mine melete hilana bati huto yauba bo ya'amagi enali faga fagalo bona'i enali hapa'ani huto hulenogo enubuya'ani'mu fililabe. 17 Lenali bati suhi hite neminenogo kalana'i mele lepelenogo Hu'mau kehelinogo bati hinogo yauba tilina'mu yabe. To lenali foipana nelinogo kalana'i mele lepelenogomo yauba limilina'mu yabe. 18 Kilisitou ai ana huto bo lamana'a mino'ehina bouba bo foipa'a lali kumu yabe luto fili'ehina. Ai Kilisitou asaga bona'magihi foipana'ani su halibe luto silaga bona'i foipana'ani'mu yabe luto kana'a moneko'i filigo su ho'ehina yabe. Yamofihi Hu'mamofitoga lenele'mo malalube luto lolo hu'ehina. Enali he'ahana'mu ai mega gufa'auba fili'ehinaya meha'a hetofa Sikalafu'uba le'mo mopo higo mino lito buto mino'ehina. 19 To meha'a hiti minoto filite bi'ahana'amagi naga gegisagu nehana enalitoga Sikalafu'uba ho lifigo buto limito ka lamana'a lu epi'ehina yabe. 20 Ya'ma kene'magi enali koyapa'i Noau ai nagamilugu boti lolo huto nohigo ana kanagu Hu'mau komopa'agu fulu hilibe luto komopa'ani i gelehe hilabe luto geba huto minomo tigo kaga'a keheli he'mite pelesa ite mineme ti'ahana. Ya nehago boana'i 8, loe'asi nagamilugu nagu tite sifite mine'ahana. To Hu'mau enubuto bi'ehina'amagi enaligo mine'ahana. 21 Ya suhi hago luga'a ya'ma mono nagamilugu lenele'mo bati hulata bo nohibe. Mono nagami'uba mega lugufa'a kolo tanana nokala hilina meni'ibe. Lali mono nagami'i nofoloto komopati Hu'mamofitoga nomoloto ai komopatigu nokala hinogo gulu gulu lilibe luto nagami'i fololata nohune. To ya huto lubuto bilibe luto Yesu Kilisitou fili'ehinaguti aku'i ho ti'ehina yabe. 22 To ai kokulumalugu tito Hu'mamofihi yahi lamaga'aga mino moloto nohibe. Yaga nohigo agelomagi mine'ahana'a hiti to kokulumalugu enigihiti bo mine'ahanaya amuya'a hiti mine'ahanaya Yesu enebe ligito kaba hu epoloto nominabe.